Du hues d'Recht, ze spillen
Du hues d'Recht ze rennen, ze dreemen an denge Gedanke fräie Laf ze loossen, ze raschten an dech z'entspanen, fir datt s du wuessen an dech entfale kanns. Du hues d'Recht, dech z'ameséieren an déi Saachen ze maachen, déi dir Spaass maachen! Spillen, Sport maachen, Konscht bedreiwen, dinn dir gutt an erlaben dir, nei Talenter z'entwéckelen. Dacks kommen dir déi beschten Iddien, wann s du dech langweils. A Beweegung ass gutt fir d'Gesondheet.
Spille bréngt däi Gehier a Schwong
Beim Spillen entwéckels du Tricker, Strategien, an du léiers, Uweisungen ze befollegen. Dech entspanen a raschte stäerkt däi Kierper an däi Geescht. Laache mécht esouguer glécklech: Laachen ass dat beschte Medikament.
Wat heescht dat?
Du hues net genuch Zäit, fir dech z'entspanen, wann däin Dag ze vill vollgepaakt ass mat Aktivitéiten an der Schoul, an der Maison relais, mat Aufgaben, Trainingen, Musekscoursen, an anere Mussesaachen.
Schwätz doriwwer mat dengen Elteren oder mat de Persounen, déi sech ëm dech këmmeren, fir deng Woch besser ze plangen an zesumme Momenter ze fannen, wou s du einfach fräi bass.
D'Regierung mécht alles, fir datt d'Kanner déi selwecht Chancen hunn
Sou sinn zum Beispill d'Musekscoursë gratis fir all déi Jonk zu Lëtzebuerg. D'Gemengen an de Service national de la Jeunesse bidde vill sportlech a kulturell Aktivitéiten un, fir sech z'ameséieren an an d'Vakanz ze goen.
Kulturpass
Am Lycée ënnerstëtzt de Kulturpass kanns du vu Präisreduktiounen op kulturellen Aktivitéiten, bei Concerten, Veranstaltungen, am Theater an am Kino profitéieren. Hues du dat schonn eng Kéier probéiert?